睇咗集李怡做嘉賓嘅《鏗鏘說》，相當欣賞佢講得出以學生心態向後生一代學習嘅說話，因為人生在世最需要練就嘅就係學養、器度，願意企喺他人角度思考，願意同後生仔並肩而行，呢種思維轉換本身就係遠離華夏食人族嘅第一步。李怡嘅存在之所以有價值，正在於佢證明咗人類係會因為見到人性光輝而改邪歸正，恢復本性，即使佢嘅成長經驗始終限制咗佢對香港民族嘅理解，佢已經稱得上係一位非常難得嘅香港人。
因此我想借題發揮講民族嘅誕生。節目裡面李怡提及，自己已經七老八十，但人生之中從來未見識過反送中所釋放出嘅力量，呢種反應正正就係香港民族已經係事實嘅最佳證據。佢人生經驗如此豐富，佢都無法輕易消化同理解所謂後生仔嘅勇氣，於是更覺震撼，原因其實非常簡單，事關香港民族嘅內在精神就係要醞釀到呢一刻至夠力徹底爆炸，而於我而言，一切都唔係無中生有，而係厚積薄發。
歷史從來都係為政治服務，所以蘇聯同中共都會篡改歷史，設計佢地想要嘅真相。重塑香港歷史嘅途中，我都成日遇到人地話我係過度樂觀嘅批評，但我只係用我生於香港而育成嘅一種歷史之眼，對世界歷史同香港歷史作出回應——要對抗深知歷史嘅功能嘅無恥之徒，唯一方法就係盡力去呈現自己相信嘅真相，而可以睇得出香港民族存在嘅人，睇得出華夏文化純粹虛妄之人，就只有香港民族。
李怡經歷中共統治，又無法全盤否定華夏文化，但佢因為明白何謂愛而棄暗投明，以一個經歷二戰嘅老人而言，其實已經係超額完成。香港民族初生代嘅強大力量，係源於已經徹底去除華夏食人族遺毒，源於忠於自我而自然而生嘅無畏無懼，源於傾向願意信任而非計算嘅天性善良，呢啲都係中國人同埋唔少香港人覺得事態發展出乎意料但對香港民族而言則係合情合理嘅解釋。
李怡有一段說話講得合理，佢清楚意識到大時代唔係由他人定義，而係視乎人對自己身處嘅時代有點樣嘅感覺，產唔產生得出使命感。而家世界正觀望緊一個先由英國扶植而起，繼而靠自身努力去克服缺點、步步向前嘅民族，而香港人亦正處於一個民族誕生嘅過程之中——呢種難以言喻嘅激動既令人興奮，亦註定因注滿鮮血而感傷，但天命降臨，大家都只可以頂硬上，為自己人生同世界歷史譜寫出必然嘅劇情。香港獨立係必定會發生，中國解體亦然，但我地嘅集體意識係咪已經追得上面對所謂大時代所需要嘅歷史視野？呢一點正係已經展示出勇氣嘅香港民族下一步要思考嘅事。
要擁有所謂歷史視野，既要靠經驗累積，亦要靠思考推理，但更重要嘅係感受生活，努力生活，首先成為健康嘅個體。愛情又好，政治又好，其實一開始都係一個人嘅事，人生態度未做到精進自身，未做到嚴己寬人，就會不停向身邊人輸出負面情緒，最後導致集體嘅挫敗崩潰，華夏食人族嘅五千年腐敗，已經係人類歷史上最血淋淋嘅教訓。
願大家睇完李怡訪問之後，都會更加愛自己，愛自己人，感受到做人就係政治，政治亦永遠離唔開好好做人。
https://www.youtube.com/watch?v=BS_-G3m4-9A
Search